As escolas cooperativas reuníronse para debater o futuro do ensino no 4º Congreso galego do sector 

O 4º Congreso Galego de Cooperativas de Ensino tivo lugar o pasado sábado no Hotel Carlos I de Sanxenxo cunha participación de preto de 100 persoas inscritas, pertencentes a 14 cooperativas de ensino de toda Galicia e a entidades sindicais do sector educativo.

O Congreso está organizado por EspazoCoop e ACES-Galicia, co apoio da Rede Eusumo, e enmárcase na celebración do Ano Internacional das Cooperativas 2025, co obxectivo de poñer o foco no ensino cooperativo como unha fórmula viable, sostible e competitiva, alternativa ao modelo privado tradicional, que combina calidade educativa, democracia interna e mellora das condicións laborais do profesorado.

Saber máis

Chega SOMOS CULTURA, SOMOS COOP un evento que reunirá ao cooperativismo cultural en Galicia

EspazoCoop, en colaboración con Coceta, no marco do Ano Internacional das Cooperativas 2025, celebran a próxima semana un encontro do cooperativismo cultural en Galicia os días 26, 27 e 28 de novembro nas cidades de Santiago de Compostela, A Coruña e Pontevedra, respectivamente.

O encontro de tres días SOMOS CULTURA, SOMOS COOP reunirá a cooperativas culturais, asociacións de cooperativas e público interesado de diversos territorios (Valencia, Andalucía, Cataluña, Madrid e Galicia), nunhas xornadas apoidas pola Consellería de Cultura, Lingua e Xuventude a través de Agadic, a Consellería de Emprego, Comercio e Emigración, a Deputación da Coruña, a Rede Eusumo, e o Ministerio de Trabajo y Economía Social, en colaboración co Concello de Santiago de Compostela, o Concello da Coruña e Culturgal.

Saber máis

Gala da clausura do Ano Internacional das Cooperativas 2025

A Consellería de Emprego, Comercio e Emigración e o Consello Galego de Cooperativas promoven un acto de visibilización do Ano Internacional das Cooperativas 2025, o vindeiro 11 de decembro, unha xornada concibida como recoñecemento ao papel esencial que desempeñan as cooperativas no desenvolvemento económico e social de Galicia. O evento terá lugar ás 17:30 h nun recinto cuberto situado na Praza da Quintana, en pleno corazón de Santiago de Compostela.

Baixo o lema “É posible vivir dentro do cooperativismo”, a gala destacará o valor desta fórmula empresarial como motor de creación de emprego de calidade, promoción da igualdade e fortalecemento do tecido produtivo galego. A iniciativa pretende poñer en primeiro plano o compromiso das cooperativas coa sustentabilidade, a cohesión social e a economía do territorio.

A xornada contará cun programa de carácter institucional e divulgativo no que se porán en valor os principios cooperativos, o seu impacto no presente e as oportunidades de futuro que representan para Galicia.

A participación é aberta ao público, mais requírese inscrición previa a través do formulario de inscrición habilitado pola organización.
 

A USC lanza un programa de mentorías para acompañar emprendedoras no desenvolvemento de plataformas dixitais

Un programa pensado para proxectos que prioricen a figura cooperativa, a inscrición pecharase o 5 de decembro de 2025.

A Universidade de Santiago de Compostela, no marco do Proxecto ES-Factory lanza un programa de mentorías gratuíto para acompañar persoas emprendedoras no desenvolvemento de plataformas dixitais. A convocatoria está dirixida a quen queira crear a súa propia plataforma (por exemplo xestionar compras compartidas ou produción a demanda, free tours, actividades deportivas ou aulas particulares, entre outros). As plataformas poden ser concebidas como novas liñas de negocio ou como novos proxectos empresariais e priorizarase a figura cooperativa.

O programa ofrece mentorización especializada e formación práctica, en modalidade virtual e presencial. A dita mentorización fai parte das accións de ES-Factory, proxecto europeo liderado pola Xunta de Galicia nun consorcio de entidades de Galicia e o Norte de Portugal do que tamén é socia A Unión de Cooperativas EspazoCoop.

Saber máis