8M COOP | Día Internacional da Muller

As cooperativas rompen os estereotipos de poder e son exemplo de igualdade:

Mulleres de todo o mundo elixen o modelo cooperativo como unha ferramenta que ofrece posibilidades de acceso ao emprego, que permite participar, tomar decisións e exerxer a autonomía, poñendo en practica modelos de liderado novidosos e igualitarios, baseados nos principios cooperativos, que rompen cos estereotipos de poder. As cooperativas permiten mellorar a economía das mulleres en todo o mundo e o seu desenvolvemento persoal e profesional, xa que o modelo cooperativo conta con valores e estratexias poderosas para afrontar a desigualdade e os déficits de dereitos.

No 8 de marzo Día Internacional da Muller, EspazoCoop reivindica o modelo cooperativo como un recurso facilitador da igualdade e de dereitos para as mulleres e a sociedade.

---

Ourense e Chantada acollen en marzo charlas sobre emprendemento cooperativo

O primeiro paso para dinamizar e impulsar o emprendemento en cooperativa é sensibilizar sobre esta alternativa de autoemprego colectivo. A través do Programa de Sensibilización do Emprendemento Cooperativo de EspazoCoop achegamos ás persoas como é a realidade dunha cooperativa, as súas particularidades e as potencialidades deste modelo a nivel laboral. A actividade divulgativa que propón EspazoCoop consta dunha exposión divulgativa e da participación de experiencias reais de cooperativas en funcionamento.

A inscrición continúa aberta para as próximas sesións en Ourense o 20 de marzo, nas instalacións da Confederación Empresarial de Ourense (Ceo Ourense), e en Chantada o 21 de marzo na sede de Daveiga-Galletas Mariñeiras.

Saber máis

 

---

Entrevista á cooperativa Magia en la Manga, participante no programa EspazoCoop Emprende

O programa "EspazoCoop Emprende. O teu Futuro é Cooperativa", impulsado pola Unión de Cooperativas, entrevista a Magia en la Manga S. Coop. Galega, unha das cooperativas beneficiarias dos servizos de apoio ao emprendemento do programa: "Para nós, programas como EspazoCoop Emprende foron claves para poder crear a cooperativa".

EspazoCoop Emprende é un programa Éfeso, que conta con financiamento do Fondo Social Europeo Plus para o período 2021-2027.

Saber máis

 

---

Grupo para a intercooperación forma a través do informal

Convite para participar no Vermú Cooperativo Rosmón 2.0 impulsado por varias cooperativas da cidade de Vigo:

 

As cooperativas 13 Grados, Catro Ventos, Miudiño e A Morada, convídanvos a compartir con elas unha nova edición do Vermú Cooperativo Rosmón, unha actividade autofinanciada, que terá lugar o vindeiro xoves 13 de marzo de 12:00-14:00 h na A Morada (Enrique X. Macías, 6 - Vigo).

 

O obxectivo é establecer un punto de encontro para xente chulísima das cooperativas galegas, veciñas da comarca de Vigo ou arredores e mais aló, que permita coñecerse, rosmar sobre o que consideredes oportuno e incrementar as posibilidades de intercooperación entre vós, compartindo coas persoas asistentes o inicio da estratexia de intercooperación xurdida da anterior xuntanza.

 

Achégase o formulario para a inscrición previa e poder organizar mellor o encontro, sendo a data límite para facelo o 11 de marzo. Tende en conta que as prazas son limitadas así que logo non lle chores!

 

---