A vosa voz é fundamental: chamada ás socias a participar no Plan estratéxico de EspazoCoop 2026-2029

En EspazoCoop abrimos un novo proceso de planificación estratéxica para o período 2026-2029. Poñemos en marcha consultas e espazos de reflexión para recoller aquelo que nutrirá a estratexia, e a elaboración dun plan que marcará o rumbo a seguir ata 2029. 

A vosa voz é fundamental, por elo, queremos convidarvos a participar nas accións que estamos a organizar para que vos sumedes a elas. Son accións coas cooperativas, o consello reitor, o equipo técnico e axentes clave, que inclúen enquisas, entrevistas, e grupos focais (sesións presenciais de traballo, análise, discusión e reflexión). 

Así, o vindeiro venres 27 de febreiro organizamos 2 grupos de traballo con cooperativas, como parte da fase de identificación de novas necesidades e retos. O primeiro dos grupos de 12-14 h. e o segundo de 16-18 h., en Santiago de Compostela. 

Animámosvos a participar e inscribirvos nos grupos de discusión abertos á base social, xa que esta reflexión non tería sentido sen a vosa achega e colaboración.

Saber máis


 

---

A Xunta convocou o Bono Consolida Economía Social 2026

A Xunta convocou as axudas para a consolidación e impulso das entidades da economía social: Bono Consolida 2026.

O Diario Oficial de Galicia publicou a convocatoria deste ano do Bono consolida economía social, trátase de axudas para o apoio e a consolidación das entidades da economía social de Galicia e para reforzar a súa presenza no tecido económico, con especial incidencia na transformación dixital e na mellora da eficiencia enerxética.

Poden ser beneficiarias destes apoios sociedades cooperativas e laborais, empresas de inserción e centros especiais de emprego que estean rexistrados e acrediten unha antigüidade mínima de 42 meses.

O prazo para presentar solicitudes abrangue do 10 de febreiro de 2026 ás 9 h. ata o 10 de abril de 2026 ás 20 h.

Saber máis

---

Entrevista a Terra Adestramento e Saúde S. Coop. Galega Xuvenil, participante de EspazoCoop Emprende

O programa "EspazoCoop Emprende. O teu Futuro é Cooperativa" entrevista a Terra Adestramento e Saúde S. Coop. Galega Xuvenil, unha das cooperativas beneficiarias dos servizos de apoio ao emprendemento do programa: "EspazoCoop foi clave no desenvolvemento de Terra como sociedade cooperativa".

EspazoCoop Emprende é un programa Éfeso, que conta con financiamento do Fondo Social Europeo Plus para o período 2021-2027.

Saber máis

---

Convocados os "Premios á Cooperación" e o "Certame Cooperativismo no Ensino" 2026

A Consellería de Emprego, Comercio e Emigración publicou as bases reguladoras dos Premios á Cooperación, e do Certame Cooperativismo no Ensino. Ambas iniciativas destinadas a reforzar a divulgación dos valores cooperativos entre o alumnado dos centros educativos galegos e a poñer en valor o traballo que desenvolven as cooperativas na consolidación deste modelo empresarial.

A convocatoria ten un prazo de presentación de solicitudes aberto desde o 26 de xaneiro ata o 30 de abril de 2026.

A medida contribúe a visibilizar o papel do cooperativismo como motor de crecemento económico sustentable, que crea emprego de calidade, integrador e asentado no territorio contribuíndo a xerar actividade e a fixar poboación no rural.

Saber máis


 

---

EspazoCoop lanza unha oferta de contratación para realizar un servizo de adaptación de materiais formativos

Convócase un concurso público, para a realización do servizo de adaptación pedagóxica e técnica a formato SCORM dos materiais formativos elaborados no marco do proxecto EC4RURAL, financiado por LIFE, co fin de poñer en marcha un curso MOOC de autoformación, aberto á cidadanía, que permita a transferencia, reutilización e permanencia das aprendizaxes acadadas polo proxecto máis alá da súa duración.

O curso deberá sustentarse en materiais non caducos, reutilizables e facilmente actualizables, garantindo a súa transferibilidade e uso futuro por parte das entidades socias do proxecto.

Os materiais a adaptar xa existen, e serán facilitados á empresa licitadora por parte de EspazoCoop en formato texto editable, xunto coas actividades prácticas correspondentes a cada módulo. O obxecto do contrato non inclúe a creación de novos contidos, senón a súa adaptación pedagóxica, estruturación e maquetación en formato SCORM.

Prazo de presentación de propostas ata o 12 de febreiro de 2026.

Saber máis
 

---

Living Lab sobre Economía Azul turística e turismo responsable, no marco do proxecto Bluedots

Volvemos con noticias sobre o proxecto europeo Bluedots, Blue Economy Dixital Opportunities for Social Economy Transition, que como sabedes, COCETA, a nosa Confederación de cooperativas traballo estatal, está a implementar actualmente xunto con outros socios europeos.

No marco do proxecto, vai celebrar outro Living Lab sobre Economía Azul Turística e Turismo responsable. Terá lugar os días 13 e 14 de marzo en Milán, Italia. Este encontro coincidirá coa feira italiana Fa la Cousa Giusta. Esta é unha das feiras máis importantes de Italia dedicadas á economía social e a sustentabilidade, e na que tamén haberá espazos dedicados ao Turismo e a Economía Azul. Igualmente, é un punto de encontro para cooperativas, empresas sociais, Ong, e organismos públicos, onde se comparten ideas innovadoras e solucións a distintos retos. Así mesmo, é unha contorna potencialmente interesante para establecer contactos e xerar novas iniciativas.

O proxecto ofrece ás entidades seleccionadas unha axuda de viaxe. Para inscribirse e solicitar dita axuda cómpre facelo antes do 16 de febreiro de 2026.

Saber máis

---

"FORMACOOP", o programa de formación en xestión, comeza en febreiro

Aínda está aberta a inscrición ao programa de formación en xestión FORMACOOP, que se celebrará nos meses de febreiro a maio de 2026 ofrecendo catro cursos especializados de teleformación, gratuítos, de 25 horas cada un, impartidos dende a Aula Virtual de EspazoCoop.

• Contabilidade cooperativa nivel 0
• Formación comercial: coopera, comunica e vende
• Formación para cadros directivos de cooperativas
• Contabilidade cooperativa nivel pro

O programa créase como unha iniciativa integral para mellorar as competencias e o desempeño profesional en xestión cooperativa nos ámbitos económico, comercial, societario, e de planificación estratéxica de empresas cooperativas.

Saber máis
 

---

A Dirección Xeral de Promoción da Igualdade lanza unha iniciativa para identificar mulleres profesionais en Galicia

Desde a Dirección Xeral de Promoción da Igualdade solicitan a colaboración nunha iniciativa destinada a dar maior visibilidade ás mulleres profesionais de Galicia. 

Están a traballar na creación dun espazo de procura de perfís profesionais especializados en diferentes sectores, concebido como unha ferramenta práctica e aberta para facilitar a localización de mulleres dispostas a participar como poñentes, relatoras ou especialistas nos seus respectivos eidos de traballo.

Para que esta iniciativa represente a diversidade territorial e sectorial de Galicia, as mulleres profesionais da base social de EspazoCoop, do sector cooperativo e da economía social interesadas poden inscribirse de maneira voluntaria a través do seguinte: formulario de inscrición

A iniciativa busca ampliar a presenza de mulleres expertas nos espazos públicos e contribuír a unha sociedade máis diversa, plural e representativa.

---

Axudas