Boletín EspazoCoop

A Xunta convoca as axudas para transformar negocios en cooperativas: ES Transforma 2024

A Xunta de Galicia convoca o programa ES-Transforma en cooperativas ou sociedades laborais para a anualidade 2024. A finalidade deste programa é apoiar á transformación en cooperativas ou sociedades laborais dos negocios sen relevo xeracional (de todo tipo de sociedades) e das persoas traballadoras autónomas, que xa estiveran a exercer unha actividade económica. A convocatoria diríxese as cooperativas e sociedades laborais que xurdan dun dos seguintes procesos: constitución por ausencia de remuda xeracional, constitución por persoas autónomas, e constitución por transformación. Prazo de solicitudes 16 de setembro de 2024. Ler máis

A Memoria Social de EspazoCoop do pasado ano foi presentada na asemblea anual con destacadas cifras e logros

Os resultados da Memoria Social foron presentados a pasada semana na Asemblea ás nosas socias, a Unión segue a presentar destacadas cifras e logros. EspazoCoop é entidade de referencia en Galicia, unha organización do movemento cooperativo que agrupa a 265 cooperativas de distintos sectores e inspírase nos principios e valores cooperativos de apertura, autonomía, participación, interese pola comunidade, solidariedade, transparencia, formación continua, igualdade de xénero e defensa da cultura e lingua galega.

A través dun vídeo curto resúmense os fitos máis destacados recollidos na Memoria Social 2023. Ler máis

O programa de teleformación "Coopera Rural" continúa con dous cursos para emprender no rural baixo o modelo de empresa cooperativo

A Unión de Cooperativas EspazoCoop organiza o programa formativo “Coopera Rural. Fortalecendo o tecido cooperativo no rural” que se imparte nos meses de xuño e xullo de 2024, trátase de teleformación, gratuíta, que se desenvolve na Aula Virtual de EspazoCoop. Estas son as accións nas que a inscrición continúa aberta:

- Habilidades para o traballo en equipo en cooperativas | Do 19 de xuño ao 7 de xullo, 25 h.
- Desenvolvendo a idea cooperativa | Do 17 de xullo ao 2 de agosto, 25 h. Ler máis

EspazoCoop organiza un programa de formación especializada sobre cooperativas que inicia o 26 de xuño

A Unión de Cooperativas Espazocoop lanza o programa de Formación Especializada de Cooperativas realizado co apoio do Concello de Santiago de Compostela. O programa ofrece 4 cursos gratuítos e presenciais que se desenvolverán nas instalacións de Cersia Empresa en Santiago de Compostela os meses de xuño e xullo de 2024:

- Xestión de cooperativas: facturación e fiscal | 26 xuño, 5 h.
- Xestión laboral de cooperativas | 3 xullo, 5 h.
- Intercooperación: poñendo en valor a cultura de intercooperar | 10 xullo, 5 h.
- Organización e xestión societaria en cooperativas | 17 xullo, 5 h. Ler máis

O Catálogo 2024 da Unión recolle as actividades, programas e servizos que está poñendo en marcha este ano

As asociacións de cooperativas xogamos un papel esencial na consolidación e apoio ao cooperativismo. A Unión de Cooperativas Galegas EspazoCoop colaboramos en programas e estratexias que consoliden o cooperativismo e especialmente os que fagan máis fortes ás súas cooperativas socias.

Neste contexto elaboramos o Catálogo 2024 de EspazoCoop con distintas actividades e servizos programados este ano, realizados en colaboración con distintos axentes e institucións. Se tes interese en participar nas propostas que ofrecemos, ou necesitas máis información, non dubides en contactar con nós. Ler máis

Enquisa para Estudo das necesidades de formación 2024 [Coceta]

A Confederación estatal de cooperativas, Coceta, solicita ás cooperativas socias colaboración na cumprimentación da enquisa sobre "Detección de Necesidades de Formación 2024 da Economía Social" entre o persoal directivo, responsables de recursos humanos e de formación das vosas cooperativas e empresas da Economía Social.

A enquisa non leva máis de 5 minutos na súa cumprimentación e permite ter unha idea cuantitativa das demandas formativas no noso sector, o cal dará como resultado as especialidades formativas que aparecerán en futuros plans para formar as persoas traballadoras das cooperativas e empresas de economía social. A enquisa estará dispoñible ata o 7 de xullo 2024. Enlace á enquisa

Hub Olympe Emprende, un novo espazo de apoio ao emprendemento feminino

Hub Olympe Emprende é unha iniciativa que impulsan conxuntamente Genera+ S. Coop. And. e Asociación Creacciona Innovación e Emprendemento Social de Andalucía, Abeluria S. Coop. Galega de Galicia e Tandem Social de Cataluña, no marco da convocatoria do Programa de Emprego, Formación, Educación e Economía Social (EFESO).

O Hub Olympe Emprende está aberto a todas aquelas mulleres e equipos liderados por mulleres que queiran emprender ou consolidar o seu propio proxecto con valores da Economía Social e Solidaria en Andalucía, Cataluña ou Galicia e que, preferiblemente, pero non de maneira excluínte, pertenzan ao medio rural. Ler máis

Pont-Up Store abre candidaturas ata 5 de xullo.
Dá a coñecer o teu emprendemento

Xa é posible presentar candidaturas para participar na 11ª edición do Encontro de Emprendemento PONT-UP STORE, que se celebrará os días 20 e 21 de setembro na Praza de España en Pontevedra.

Esta iniciativa, dirixida pola Asociación para o Emprendemento e a Innovación: Pont-Up Store, promovida dende Campus CREA de Pontevedra (Universidade de Vigo) e que conta co apoio do Concello de Pontevedra como patrocinador principal é froito da cooperación de máis de 50 entidades públicas e privadas que durante estes anos foron sumándose ata conformar un ecosistema de apoio ao emprendemento co obxectivo de converter a Pontevedra durante dous días na capital galega das mellores iniciativas empresariais. Se tes un novo emprendemento con menos de 3,5 anos (42 meses) dende a creación da empresa envía a túa candidatura. Ler máis

Xornadas Impacto Positivo e Emprendemento
18 - 19 xuño en O Barco e O Porriño

Alén, cooperativa socia, colabora nun ciclo de sesións sobre Impacto positivo e emprendemento organizadas para a Rede de Polos de Emprendemento en O Barco e O Porriño, nas que afondarase na importancia de integrar a sostibilidade nos proxectos de emprendemento e coñecer máis sobre as iniciativas locais de impacto positivo.

Se buscas integrar a sostibilidade no teu proxecto de emprendemento ou organización podes participar nestas actividades organizadas dende a Rede de Polos de Emprendemento, falarase da importancia da sostibilidade e profundarase nas iniciativas locais de impacto positivo. Aproveita estas oportunidades para establecer conexións e sinerxías con persoas coa intención de impulsar e apoiar este tipo de proxectos!. Ler máis

Axudas

Cooperativas socias: tomade nota das últimas axudas convocadas As asociadas podedes consultar as diversas referencias de axudas e acceder ás bases neste enlace: Axudas (introduce a clave habitual, ou contacta e facilitámoscha).

Licitacións

Sección para socias sobre licitacións en vigor ofertadas por administracións e organismos públicos. Acceso neste enlace (introduce a clave habitual, ou contacta con EspazoCoop para conseguila).